Қазақстанда сауда-ойын-сауық орталықтары, кеңселер мен қоймалар сияқты санаттардағы коммерциялық жылжымайтын мүлікке сұраныс айтарлықтай өсетін болады. Мұндай қорытындыны «Астана» халықаралық қаржы орталығы (АХҚО) әкімшілігінің сарапшылары Қазақстандағы коммерциялық жылжымайтын мүлік нарығына және REIT нарығының перспективаларына жасаған талдамалық шолуда ұсынды.

Коммерциялық жылжымайтын мүлік инвестициялауға ең тартымды секторлардың бірі саналады. Ұлттық статистика бюросының мәліметінше, Қазақстандағы жылжымайтын мүлікпен жасалатын операциялардың негізгі капиталына салынған инвестициялар соңғы онжылдықта тұрақты өсім көрсетіп, 2023 жылы 3,2 трлн теңгеге ($7,1 млрд) жеткен, бұл 2015 жылмен салыстырғанда 4,1 есе көп.

Statista мәліметтері бойынша, Қазақстанның жылжымайтын мүлік нарығы 2023 жылы $0,89 трлн (406,1 трлн теңге) бағаланды. Жылжымайтын мүлік нарығы 2024 жылға қарай $0,98 трлн (450,8 трлн теңге) дейін өседі, ал 2028 жылға қарай орташа жылдық өсу қарқыны 6,7% болғанда $1,27 трлн (584,2 трлн теңге) жетеді деп болжануда.

2023 жылы Қазақстанда жылжымайтын мүлік нарығының ЖІӨ-ге қатынасы 3,44 құрады, ал АҚШ-та бұл көрсеткіш – 4,15, Канадада – 3,69, ал Қытайда – 7,43 болды.

Кеңсе орынжайлары

Алматы мен Астанадағы кеңселік жылжымайтын мүлік нарығы ұсыныс көлеміне және жалдау мөлшерлемелеріне әсер ететін елеулі өзгерістерге ұшырады. 2023 жылы Қазақстанда сомасы 135 млрд теңгеге ($296 млн) 595 590 м2 кеңсе алаңы пайдалануға берілді, бұл ретте Астана мен Алматы көш бастап тұр, бұл қалалар орынжайлардың аудандары бойынша да, құны бойынша да тұрақты өсімді көрсетуде.